( الحبيبة الملحمية _ لآنسةٍ من خيال الغناء )

( الحبيبة الملحمية .
هي اللي خالَت رِفقة الروح في التداعِي ، أسمى آيات الخليقة .
و اللي كانت في عيون الطفلة بتنقّي الدواخل ، وتسري نديانة وصديقة .
دي الحبيبة ، اللي أصوات العصافير اقتنتها زهرِ مشرور في حديقة . )
{ وما تخلي بيبانِك تطِش ، واللِيلك أَهديبو الخلوق .
بارياهو ما فِضلت تهِش في سيرة الزول الخفيف ، الشال ملامح القمرا واتنقع فواصل من غنى .
واعتلّ بالإيقاع بيطلِقْ كلمته ، دة طشاش حلاتِك ولا جِن مزروع في ورده و برتعش .
في حضرة العابرين بأطلال القلوب ، كان شاف شواطيء النيل بتضحك ، و تندهِش .
زي التقول شبه المُهاجرين في رحاب ، أو في سحاب مَسَكوبُو روح البنت  ، عطِشْ .
وبيوت مستّفة بالحنين ، أقتادت الحب في الزحام ، جابلِك بواقي الريد عرِش .
بلقيس أظنّك ولا مين ، بلقيس كأنك في الضلوع ، زي ساحة مجهولة بِرِش .}
{و قبال الحضور يتضارى ، او يتدارى .
جلست ترتقب هفوتنا ، واستلّانا بي فيض السريرة سؤالها.
- ' مين انتو ' ؟
- كنا بنشتبه في ذاتنا ، ( لو ضلينا كان تهدينا أو تتسلى بي سقيانا ؟ ).
واتغبرنا بالرحلة البتبدأ منها .
ولسة سؤالها .
- ' مين انتو ' ؟
- سكليبة وهجيج في اللمة .
' كضابّين ، مين انتو ' ؟
- عميانة الدروب الودّرت طيف المحبين يوم غشوها ، وسابو في الحلة الوصايا .
' نحن المفارقين من خيالك ، فأتركينا برهةً للضوء أو قولي ، انتباه ' .
- ' اكرر سؤالي ' ؟
- نكرر جوابنا ، ومصرين عليه ، ' انحنا المغادرين كراسي الحضور ، بنغشَاكِ كل ما غشانا الفتور ، و نهوَاكِ في كلّ أرضٍ سلام' .
- ' آه يا قلب '
- ' ها شِفة الريح قد استلطفت شَجَرا
فذابت الأرض ، كان الحب مُنهمِرا ' }
{وفرحِك بسد بيبانه من شدة وقيعة الحالة ، شاتلالك قصيد .
كيف يا بنية بتشبهي الطير النكص وعد اللقا واتحمل الشوق الشديد .
كيف يا نوافذ تندهينا ، ونشتكي .
ونحن البنتبخر حضورك وطلّتك ، ساكنانا في مجرى الوريد .
هل لو سمحتِ بندخلُك .
ولا المواعيد أدركت باقيها في الوش السعيد
( ويا بنية سألتك ، بيناتنا محبة ؟ )
وشن فيهو الريد لو كان سوَاك أبراج جواي واتسلى بنور الحبِّ سدًى .
وكيفنو الحال في موكِب راجع نحو مدُن .
لا طاب الفيها وأنت بعيد ، واتشكل فينا البعد وهَن .
وايه يعني الروح تجتاح مسرَاك ، وتضل الشوف ؟
دي الروح بتشوف قبال العين ، والعين بتخاف يصدِما رؤياك .
و يا بت مكتسية حنان وولِف ، مالو الطمبَار في غناهو وقِف .
محسوس الوتر الغنا عرِف ، انه التحليق في أقصى هواك ما ليه قيود .
يا بت متوسِدة في احلام .
اتخلقت فجأة بهذا الكون من لا صلصال صاغت فيزياء المعنى عدم .
وخانت تصريفها العفوي وجود . }
( و يا بنية سألتك ، هالحب موعود ؟ ) - { وأنا أتهيَب هذا الصمتْ ، أحط على الأشواكِ يدَيَ ، أصولُ أجولُ بغير دماء } .
{ هِب أن لي وطناً بقلبِ حبيبةٍ .
وحوائطاً للشعرِ تحمِل رقعةً بنيةً ، وتلوذ بالكلمات تخطفني إندهاش .
( قُبال أشوفِك كنت بتخيل أجيك ) .
و أنا ككلّ الناس مخلوقٌ من الفوضى ، ولي حريتي في البوحِ .
في التحليقِ في هذا الفضاء .
وهمست في أذنيك ما قد ظَلّ بي ، مُدي يديكِ اليّ نرحَلُ من هنا .
ونعود أدراجَ الرياح ، نشدّ قافلة القصيدِ الى بلادٍ لا تموتْ .
الحبّ عالمُنا اذاً ، والصاعدون الى سماءِ العشقِ اذ يتنفسون نقاءهمْ .
مُدّي سِراعاً كي نسافرَ وحدنا في غمرةِ النسيَانِ ، نترُك خلفنا الأشياءَ تبْكِي وحدها .
لابُدّ للآتين من رِحمِ الخديعةِ أن يضِلّ طريقهم ، ونضِلّ نحنُ سوءةَ العشّاقِ .
نقطف من ثمار الوهنِ أغنيةً / نشازْ .
-لكن لي شيئاً يداعبُ حيرتي
- قلت اسألي .
- قالت: ( بربّك من أنا ؟ ) }
-وقلنا _ والجهّل ملاوزين _  انتِ بس ، ياكِ انتِ .
الهويتي تلقطّي الناس الحيارى وتختفيهم بالرويحة النايره وأرتال الهديل ، واتمكّن الحِن منهم .
وانت البديتي تسوي من ذاتك مسادير، أو عصافير ، للبنيات البفشّن خُدرة الحب العليل و اتخلّف الشك عندهم .
وانت النسيتي تشكّلي الواقع بأصناف المضاليل فاتخلّق الكون منهم .
{ ويا بنية سألتك ، هل زارك شيء ؟  .
مشدوه العدّى ملامح ذاتك و ساط الواطة ذهول .
مزروع في أرضك ومتّني .
على حالو يقوقن قمريات ، ويشدّن خيل ريده تجنّي .
ولو فكّ حصار روحه شوية ، كان عتّب دار الجن إغنّي ، وصابو الما بزِح . }
{ والا في سماء بابها يفتح ، للمشاوير الطويلة .
والا ما اتسابقنا أشواق .
في وريد البذرة شبّال و احتمالات انه ما فيش أي كوكب لام هديلها .
والا ما اتشالقنا ساكِت ، و كنا بنطلّق عيون القمرا في لحظة مقيلها .
دي البنية النشفت ريق المغنين ، و اصطلاح ضهر البوابير والبكاسي .
( سارة لما تقوم تصلّي بتمشي في ضل الملائكة ) ، وكترو البوهية في حنينهم ، و حنّو متقفين دليلها ، دي البنية المستحيلة . }
{واستفقنا . لم نجد فوق جدولِك الا الزهور الباكية ، وقفت تنجهِك .
من فرط ما فيك من عذول ، كنا بنناديك يا حبيبة اتلبسي في جوانا آيات من ذهول .
واتخلقي بطين المشاكسين ، اللي قامو يلقطو الكلمات وأوزار المحبين بالفضول .
لسة بنخدّر روحنا ، واكتمل إحتشادِك عندنا . وكل المزارعين في الحقول صلّوك أوقات الحصاد ، واتاري نيلِك كان كريم .
لازال يؤدي مهمة الإشـفاق علـى كل الشتـول .
زي التقول شافهتي لون الواطة بي قدم الحنين ، والمشية ساعة الليل يودّر صُحبته ، و قدرِك تكوني محل يكون .
قدرِك تشتتي في العيون ، أقلام حزينة بتكتبك في كل حوائط الوهلة بي شوفتك ، تمارس لوعتها .
وقبال تناديك ، تحتويك وتقول حديثها الكَنّو مفطوم بارتعاش .
( يا بنية كان ودّك تشقلبي في البلاد ، والدارة تفتح فيك نقاش ؟
فالشفع التكلو الهموم على بابِك انتحلو الفراش.
متسللنك بضحكوا ، كان لوحولِك يضحكوا . و لو سوقوك في موسم الحب الحلو ، كان هسي باعوك بي بلاش )
والقطارات التوزع في محطاتك منافذ للهروب لسة ما دارت تتوب . }
{ وانا وين من دة كلو ؟
دام بيغشاك فيني بيتهوفِن يطنطن ، و بستلف منه التداعي ، عشان تبيني .}
- وانتِ بس ، ياكِ انت .
( الحبيبة الملحمية .
اللي خلتِ رِفقة الروح في التداعِي ، أسمى آيات الخليقة .
و اللي كنتِ في عيون الطفلة بتنقّي الدواخل ، وتسري نديانة وصديقة .
واللي أصوات العصافير اقتنتكِ زهرِ مشرور في حديقة .
بس لأنك فاقدة روحِك ، خنتِ جسد الرفقة في عز الحريقة .
وما بيدِك يا " رفيقة " )